22. mars 2012 |
Sauðfé prýðir bolla leirgerðarkvenna
Bollastell og fleira.
Kvenfélagið Katla í Reykhólahreppi gekkst fyrir leirnámskeiði núna í febrúar og mars, þar sem nemendur hönnuðu og mótuðu sín eigin bollastell og raunar fleira þeim tengt, svo sem „glasamottur“ úr leir. Kenndar voru grunnaðferðir í handmótun og unnið með form og mynsturgerð, meðferð oxíðefna og glerunga. Námskeiðið var haldið í Reykhólaskóla og tókst í alla staði mjög vel. Kennari var Guðbjörg Björnsdóttir í Dalabyggð.
Á myndunum getur að líta sýnishorn af handaverkum nemendanna. Réttilega má ráða af skreytingunum að talsvert er um sauðfjárbúskap í Reykhólahreppi - suma bollana prýða ær og hrútar. Spurning hvort til verði litlir lambabollar ef þeim er klingt saman.