Jóhannes Geir Gíslason.

Jóhannes Geir Gíslason skrifar

Á Reykhólavefnum nýlega var nafn mitt nefnt*) og ég titlaður gæfumaður, sem ég að vísu tel vera í hálfkæringi gert og tel stafa af því að álitsgjafi er mér ósammála um málefni. Það sem hann fjallaði um var: Á Flatey að tilheyra Reykhólahreppi?

Á sínum tíma þegar allir fimm hreppar Austur-Barðastrandarsýslu voru sameinaðir í eitt sveitarfélag var það kennt við Reykhóla, sem ég taldi þá og tel enn að hafi ekki verið gæfuspor. Ég taldi þá og tel enn að gæfulegra sé að nafn sveitarfélags spanni svæði þess. Höfuðbólalotning á að heyra sögunni til.

Ég lenti í því að vera forsvarsmaður eyjamanna, þ.e. Flateyjarhrepps, en taldi þá og tel enn að það hafi komið til af því að ég hafi verið álitinn meinlausastur þeirra sem til álita komu.

Að má út hreppamörkin innanhéraðs stöðvaði ekki þá byggðarhnignun sem komin var á fullt og bjóst kannski enginn við því. Þar vinna önnur öfl.

Sveitarfélög hafa alltaf jaðra, en þau þurfa að hafa samvinnu eftir því sem hentar. Fólk á sína kunningja óháð sveitarmörkum. Svo er alls staðar.

Náttúrufar Breiðafjarðar hefur sín sérkenni á landsvísu og heimsvísu. Það hefur einnig sín svæðaskiptu sérkenni innbyrðis.

Norðanverður Breiðafjörður er dæmi þar um með sínu grunnsævi, skerjagörðum, ísalögum og gróðurfari misfrjóu. Flatey er þar á jaðri og verður alltaf, hvaðan sem dreginn yrði hlykkur um hana. Hún hentaði sem miðstöð verslunar og samgangna meðan þær voru auðveldastar á sjó. Það breyttist þegar fastalandsleiðir bötnuðu. Hún er hins vegar innan þess hrings sem draga má um náttúrufar svæðisins til varnar, sóknar og verndar.

Þetta var mitt sjónarmið við sameiningu hreppa og er enn.

Undan þjónustusamningi við Stykkishólm vegna Flateyjar þarf ekki að kvarta. Hann nær hins vegar ekki til Inneyja og hentar þar ekki.

Byggðaeyðing sem veldur spillingu lands er ekki séríslenskt fyrirbæri. Á því taka íslensk stjórnvöld ekki rétt. Þar ferst til dæmis Norðmönnum betur.

– Jóhannes Geir Gíslason, Skáleyjum.

____________________________________________

*) Í athugasemd neðan við Opið bréf til sveitarstjórnar og fleiri varðandi Flatey