Hvert erum við að stefna?
Dr. Þorleifur Ágústsson lífeðlisfræðingur,
verkefnastjóri hjá Matís á Ísafirði:
Mér fannst ánægjulegt að sjá frétt um skynsamlegar rannsóknir sem verið er að stunda á Tálknafirði. Þar er verið að rannsaka hvort ekki sé gott að ala saman bláskel og þorsk. Þetta er að vísu ekkert nýtt. Sameldi eða fjöleldi hefur verið stundað víða um heim í einhverjum mæli - og með ýmsum tegundum. Ég hef átt samtöl og umræður við fjölda vísindamanna um þessi mál - bæði evrópska og vestanhafs. Við höfum jafnvel gerst svo djarfir nafnarnir - ég og Þorleifur Eiríksson hjá Náttúrustofu Vestfjarða, að skrifa umsóknir - já, fleiri en eina - til að þess að reyna að afla peninga til slíkra rannsókna. Rannsókna sem skilgreina mikilvægi og möguleika á að nota eina tegund (bláskel) til að minnka lífræna mengun frá þorskeldiskvíum.
En ávallt hefur þessum umsóknum verið hafnað - ekki talin vera þörf á umhverfisrannsóknum á Íslandi. Að slíkar rannsóknir auki ekki verðmæti íslensks sjávarfangs.
Þvert ofan í mat erlendra sérfræðinga sem þó hafa verið meðhöfundar á slíkum umsóknum. En nei - umhverfismálin eru bara eitthvað sem engu skilar. Því miður.
Og manni hefur liðið eins og Don Kíkóta sem barðist við vindmyllur.
Ég hef því oft spurt mig þeirrar spurningar - hví erum við Íslendingar svona áhugalausir um umhverfismál - um það að nýta náttúruna á sem næst því sjálfbæran hátt?
Ósjaldan hef ég rætt þessi mál við ráðamenn - þingmenn - þá sem eitthvað geta gert í málinu. Allir er sammála um ágæti þessa. En enginn gerir nokkurn skapaðan hlut. Við erum ennþá í sömu sporum og við vorum fyrir mörgum árum hvað þetta varðar.
En hvert ætlum við að stefna á eldi - í nýtingu sjávar og náttúru?
Hvert eigum við að stefna?
Er ekki tíminn núna - tíminn til að sýna ábyrgð og hafa framtíðarsýn sem við getum verið stolt af - bera ábyrgð á auðlindum okkar og framtíð!?
_______________________________________
Pistill þessi birtist á bloggsíðu Þorleifs Ágústssonar 2. janúar 2009.
Hlutafélagið Matís ohf. tók til starfa 1. janúar 2007. Í fyrirtækinu sameinuðust þrjár ríkisstofnanir sem unnið höfðu að matvælarannsóknum og þróun í tengslum við matvælaiðnað. Þetta voru Rannsóknastofnun fiskiðnaðarins, Matvælarannsóknir Keldnaholti og Rannsóknastofa Umhverfisstofnunar. Starfsstöðvar Matís eru í Reykjavík, á Ísafirði, Sauðárkróki, Akureyri, Neskaupstað, Höfn í Hornafirði og Vestmannaeyjum.