Ásbjörn Óttarsson.

Ásbjörn Óttarsson skrifar:

Framundan eru kosningar sem geta orðið einhverjar afdrifaríkustu kosningar sem gengið hefur verið til á lýðveldistímanum. Núverandi ríkisstjórn hefur þegar valdið vonbrigðum með úrræðaleysi sínu og skýr leiðsögn sjálfstæðismanna út úr vandanum er afar mikilvæg. Nýrra vinnubragða er þörf í Alþingishúsinu og nýrra viðhorfa sömuleiðis. Sókn er besta vörnin í þeim verkefnum sem bíða okkar og því fyrr sem hafist verður handa því betra. Hvorki atvinnulífið né heimilin í landinu geta þrifist við núverandi aðgerðarleysi og verkefni til framfara í Norðvesturkjördæmi eru fjölmörg.

Við höfum alla burði til þess að standa á eigin fótum. Við eigum öflugt og vel menntað fólk, gjöfular auðlindir til lands og sjávar og ferðaþjónustu sem stöðugt vex ásmegin. Við búum við landfræðilega einangrun sem gerir okkur kleift að varðveita hreinleika náttúrunnar og gera út á vistvæna lifnaðarhætti. Við búum við samgöngu- og samskiptatækni sem lágmarkar allar fjarlægðir, hvort sem er innanlands eða í samskiptum okkar og viðskiptum við aðrar þjóðir. Okkur eru allar leiðir færar til nýrrar sóknar og við eigum að róa á öll þau gjöfulu mið sem við höfum aðgang að.

Enda þótt reynsla mín af stjórnmálastarfi á landsvísu sé ekki mikil er ég sannfærður um að á þeim vettvangi gilda engin sérstök lögmál umfram þau sem gilda á sviði sveitarstjórnarmála. Í báðum tilfellum hljóta aðalatriðin að vera þau að skilja viðfangsefnin, virða ólík sjónarmið, taka vel ígrundaðar ákvarðanir og - síðast en ekki síst - að koma hlutunum í framkvæmd. Grunnstefin eru því ekki flókin en væntanlega er ég ekki einn um þá skoðun að í störfum Alþingis og stjórnvalda vanti sum þeirra of oft og sérstaklega á framkvæmdahliðinni. Því vil ég breyta. Ég vil koma hlutum í verk.

Ég hef kynnt sjónarmið mín og áherslur á miklum fjölda heimsókna til fólks og fyrirtækja í kjördæminu á undanförnum vikum. Spjallið við þann stóra hóp fólks sem ég hef hitt hefur bæði verið fróðlegt og hvetjandi. Og niðurstöðurnar um brýnustu verkefnin eru í raun einfaldar. Fyrst af öllu þarf að lækka vexti og endurskipuleggja lánastofnanir. Atvinnuvegirnir geta einfaldlega ekki beðið lengur eftir því að vaxtalækkun og án atvinnulífsins verður styrkur heimilanna aldrei endurheimtur. Endurskipulagningu lánastofnana þarf að gera með þeim hætti að traust almennings á Íslandi og viðskiptalífsins erlendis verði endurheimt. Grettistaki þarf að lyfta í þeim efnum. Um það hafa allir viðmælendur mínir verið sammála.

Ég hef frá upphafi þess leiðangurs sem ég lagði í með framboði mínu fyrir nokkrum vikum lagt áherslu á nokkur atriði sem ég vil einbeita mér að. Þær áherslur hafa ekki breyst eftir yfireið mína um kjördæmið. Viðtökurnar hafa aðeins aukið löngun mína til þess að bretta upp ermar og leggja mitt af mörkum. Ég vil meðal annars:

- Virkja allt afl þjóðarinnar til atvinnu- og verðmætasköpunar.

- Byggja upp heilbrigt bankakerfi sem styður við atvinnulíf og heimili.

- Endurskoða með róttækum hætti fjármálakerfi þjóðarinnar.

- Auka með hiklausum hætti nýtingu náttúruauðlinda til lands og sjávar.

- Standa vörð um markmið Samgönguáætlunar og um leið hag landsbyggðarinnar.

- Byggja upp mennta- og heilbrigðiskerfi dreifbýlis með þeim hætti að búseta verði eftirsóknarverð

- Efla atvinnulíf landsbyggðar með sjávarútveg, landbúnað og ferðaþjónustu í aðalhlutverki.

- Huga jafnframt að nýjum tækifærum iðnaðar og hátækni með bættum samgöngum og samskiptatækni.

- Vinna markvisst að endurreisn orðspors okkar og trausts á erlendum vettvangi.

Ég hvet sjálfstæðismenn í Norðvesturkjördæmi til að taka öflugan þátt í prófkjörinu um helgina. Ég hef um langa hríð verið oddviti sjálfstæðismanna í Snæfellsbæ og nú býð mig fram til forystu á sviði landsmála. Mér þætti vænt um stuðning þinn til þess að geta tekið til hendinni í þeim brýnu verkefnum sem bíða þings og þjóðar á næstu mánuðum og árum.

- Ásbjörn Óttarsson.