Lilja Rafney Magnúsdóttir.

Lilja Rafney Magnúsdóttir skrifar:

Á þessum miklu örlagatímum í lífi þjóðarinnar hefur það aldrei verið mikilvægara en nú að sjá ljósið í myrkrinu og setja okkur raunhæf markmið og vinna okkur út úr þeim gífurlega vanda sem yfir okkur hefur dunið af mannavöldum fyrst og fremst.

Fáum útrás fyrir réttláta reiði og fáum allt upp á borðið. Engum skal hlíft í skjóli auðs og valds og látum þá sem hafa brotið af sér - siðspillta fjárglæframenn og meðreiðarsveina þeirra - hljóta makleg málagjöld. Öðruvísi öðlast þjóðin ekki frið í sálu sinni.

Gerum upp við nýfrjálshyggjuna og hendum henni á ruslahaugana þar sem önnur mistök sögunnar eru geymd og látum okkur öllum það verða víti til varnaðar að hleypa ekki óheftum markaðslögmálum lausum aftur í þjóðfélaginu.

Vörðum veginn framundan með manngildissjónarmiðum þar sem réttlæti og jöfnuður eru í fyrirrúmi og lýðræðisleg umræða fer fram um þau mál sem skipta þjóðina miklu máli og að þjóðin fái að hafa síðasta orðið í þjóðaratkvæðagreiðslu um stór hagsmunamál allra landsmanna. Endurskoðum stjórnarskrána og festum í sessi eignarhald íslensku þjóðarinnar á auðlindum okkar til lands og sjávar.

Stöndum vörð um alþýðu þessa lands á þeim erfiðu tímum sem framundan eru. Hún setti ekki þessa þjóð á hausinn og byrðunum verður að vera dreift með sanngjörnum hætti eftir efnum og aðstæðum hverju sinni - saman getum við komist í gegnum þá erfiðleika sem þjóðin glímir nú við.

Stöndum vörð um velferðarþjónustuna og alla grunnþjónustu og skerum niður allt bruðl og óhóf, sama hvaða nafni sem það nefnist, og forgangsröðum í þjóðfélaginu upp á nýtt og látum börn, aldraða og öryrkja vera þar í fyrirrúmi.

Ríkisstjórn Vinstrihreyfingarinnar - græns framboðs og Samfylkingar, sem hefur 80 daga til umráða, hefur sýnt og sannað með verkum sínum, að hún er starfssöm og vill bregðast við vanda heimilanna og atvinnulífsins hratt og vel. En hún hefur takmörkuð völd og svigrúm til athafna, svo nú reynir á að kjósendur veiti Vinstri grænum gott brautargengi í komandi kosningum til áframhaldandi verka í því endurreisnarstarfi sem framundan er næstu árin.

Þjóðin kallar á réttlæti og heiðarleika og stjórnmálamenn mega ekki bregðast því kalli. Nú verða þessir tveir flokkar að leggja til hliðar deilur um keisarans skegg og sýna kjósendum fram á að hægt sé að mynda vinstri félagshyggjustjórn sem getur unnið þétt saman og byggt upp að nýju traust og trú þjóðarinnar og tiltrú alþjóðasamfélagsins til Íslands.

Sú mýta sem gengið hefur hjá hægri mönnum, að vinstri mönnum sé ekki treystandi fyrir ríkisfjármálum, fer fyrir lítið þegar þeir sjálfir hrökklast frá völdum með allt niðrum sig. Vinstri stjórn þarf nú að moka flórinn eftir þá og fjárglæframennina sem köstuðu á milli sín fjöreggi þjóðarinnar og misstu síðan niður í taumlausri græðgi en kunna ekki einu sinni að biðja þjóðina afsökunar og skammast sín.

Vinstrihreyfingin - grænt framboð hefur með verkum sínum sýnt og sannað að hún er traustur valkostur í kosningunum framundan og hefur fulla burði til að takast á við vandann af ábyrgð og festu.

Landsbyggðin hefur verið í varnarbaráttu undanfarin ár með neikvæðan hagvöxt víðast hvar og því verður sérstaklega að líta til þess í því endurreisnarstarfi sem framundan er í landinu.

Við skulum ganga til verka með jákvæðni og bjartsýni að leiðarljósi því tækifærin eru fólgin í fólkinu sjálfu og auðlindum okkar. Það var ekki þjóðin sem brást, heldur þeir stjórnmálaflokkar sem leyfðu óheftri markaðshyggju að taka hér völdin. Þeir verða að biðja þjóðina afsökunar.

- Lilja Rafney Magnúsdóttir.

Höfundur skipar 2. sæti á framboðslista Vinstri grænna í NV-kjördæmi.