Ingvar Samúelsson.

Menningin stóð í blóma í Reykhólahreppi á liðnu ári. Gallerí Gylfi í Króksfjarðarnesi var vettvangur auglýsingamyndar fyrir BMW Mini, þar sem hálf sveitin mætti í tökur í heila fimm daga. Fáeinum sást bregða fyrir í fáeinar sekúndur þegar auglýsingin loksins birtist – Sollu í leikfélaginu, hundinum Toppi sem er starfsmaður í Gallerí Gylfa, Jóni á Gróustöðum og Indu á Reykhólum.

Partur í franska mynd var tekinn upp við Staðarbryggju og í landi Árbæjar. Svo vel hittist á, að suðvestan hávaðarok og rigning dundu á mannskapnum allan tímann sem tökur stóðu yfir. Hjólhýsi var tekið á leigu fyrir aðalleikarana og fauk ekki.

Leikfélagið Skrugga færði upp söngleik með ljóðum og lögum eftir Jónas og Jón Múla Árnasyni.

Opnuð var á Reykhólum með pompi og prakt nýhönnuð báta- og hlunnindasýning. Að henni standa Reykhólahreppur, Félag áhugamanna um bátasafn Breiðafjarðar og Æðarræktarfélagið Æðarvé. Samkomulag hefur ekki verið upp á það allra besta hjá þessum aðilum. Tvisvar var skotið til hreppsnefndar sáttatillögum til umsagnar. Sagt var að uppbygging sýningarinnar hefði gengið allt of hratt undir skipulagi formanns Æðarvéa og það hafi ekki hentað framkvæmdasviði hreppsins.

Héraðsbókasafn Reykhólahrepps var opnað á nýjan leik í desember með glæsibrag í nýju húsnæði í íþróttasalnum gamla í Reykhólaskóla. Undirbúningsnefnd var skipuð fyrir einungis sautján árum, skipuð þeim Áslaugu Guttormsdóttur, Ásdísi Sigurdórsdóttur og Ingvari Samúelssyni. Vinnuhraði nefndarinnar hentaði framkvæmdasviði hreppsins mjög vel, öfugt við vinnuhraðann við áðurnefnda sýningu.

Miklar byggingaframkvæmdir voru í héraðinu. Byggð var peningageymsla á Kinnarstöðum og dótakassi í Árbæ, íbúðarhús á Klukkufelli og Hyrningsstöðum og í Fremri-Gufudal, áfram var haldið með oddvitabústaðinn á Skálanesi og byggt var í tvær áttir við Hótel Bjarkalund. Hins vegar gerðist ekkert með svítu Herdísar Ernu úti á Miðjanesi nema hvað húsið var víggirt með svörtum rúllum í heyskaparlok enda stöðuleyfið útrunnið.

Áfram var haldið framkvæmdum vegna íbúðanna tveggja við Martröð. Lóðir voru þökulagðar og bílskúrar kláraðir, gangstígar hellulagðir og strætisvagnaskýli komið upp. Kostnaðurinn er talinn vera kominn upp í 55 milljónir.

Heyskapur gekk vel í héraðinu á liðnu sumri, fyrir utan að Bakkabóndinn sló heldur nálægt eldavél sem á vegi hans varð í Saurbænum. Líklega orðinn svangur.

Göngur og réttir voru með svipuðum hætti og síðustu þúsund árin. Eitthvað þurfti lögregla þó að skipta sér af göngum í Þorskafirði.

Skipið glæsilega Grettir sterki kom loksins í Reykhólahöfn til að leysa Karlseyna gömlu af hólmi. Fimm framkvæmdastjórar mann fram af manni og skipstjóri og vélstjóri voru orðnir leiðir á því að ferðast um heiminn til að skoða vænleg skip.

Nýr framkvæmdastjóri var ráðinn að Þörungaverksmiðjunni og óskum við honum velfarnaðar í starfi. Athygli vekur hins vegar að aldrei hefur kona stjórnað verksmiðjunni.

Á vef Reykhólahrepps var rakið fyrir skömmu hversu margar konur stjórna ótrúlega mörgu hinu og þessu í sveitarfélaginu. Hvar er nú jafnréttið, karlar í sveitinni?

- Höfundur og flytjandi: Ingvar Samúelsson.