Jóni Atla Játvarðarsyni á Reykhólum ratast iðulega vísa á vör eftir því sem þjóðmálum vindur fram. Hann var við þangskurð í Kerlingarfirði þegar þing var sett á liðnu hausti og nefndi þær Jóhönnu Sigurðardóttur og Álfheiði Ingadóttur eftir gyðjum að venju. Að bóka gigg er tilvísun í frægðardrauma Ólafs Ragnars (Hannessonar) í Vaktaseríunni marglofuðu.

          Álit gefa Freyja og Frigg,

          fúlar eins og gengur.

          Ólafur bókar enn eitt gigg

          þótt enginn vilji lengur.

Guðni Ágústsson og Baldur Óskarsson tóku sig til eftir áramótin, gengu um héruð og söfnuðu áskrifendum að Ólafi Ragnari Grímssyni.

          Um þó fer hvern Íslending.

          Á það nú ég bendi.

          Guðni og Baldur ganga í hring

          með gylltan staf í hendi.

Forsetinn var sagður ekki ánægður með að ekki væru allir ánægðir með hann, en varð þá bara ennþá ákveðnari að halda sínu striki.

          Ólafi blöskrar ósætti,

          enginn meðalskáti.

          Ætlar að deyja í embætti,

          öll svo þjóðin gráti.

Síðan var gerð skoðanakönnun sem sýndi að einungis þriðjungur þeirra sem afstöðu tóku myndi kjósa Ólaf Ragnar.

          Þriðjungur í þennan dans,

          sem þó mun laus í hendi.

          Framboðsraunir forsetans

          fá þar skjótan endi.