Jón Atli Játvarðarson.

Með frétt um styrk til endursmíði bátsins forna sem fannst í kumli í Vatnsdal við Patreksfjörð er teikning af „legu rónaglanna“. Eitthvað hefur Jóni Atla Játvarðarsyni farið svipað við lesturinn og þegar útvarpsþulur misskildi (eða skildi alls ekki) orðið ístruflanir, sagði ístru-flanir og steinþagnaði svo í miðri setningu áður en hann hélt áfram lestri fréttar um truflanir í virkjun vegna ísreks.

Jón Atli kveður:

Byrðingur fór á bólakaf.

Barfluga verpti í sandi.

Rónaglanni var réttur af,

svo ræki hann ekki frá landi.

Ekki mikið út af ber.

Þó ætti að fara vel.

Rónaglanni um fjörðinn fer

á furðu lítilli skel.

Margir þvælast á milli tanna,

má vera að slettist blóð.

Hjalti réttir af rónaglanna,

sem rak út af merktri slóð.