Á söguslóðum Georgs Bjarnfreðarsonar
Aðdáendur þáttaraðarinnar Dagvaktarinnar á Stöð 2 hafa flykkst í Hótel Bjarkalund í Reykhólasveit. Árni Sigurpálsson hótelstjóri segir að fólk láti gjarnan mynda sig þar sem ákveðin atriði voru tekin upp og hefur fundið fyrir áhuga gesta eftir sýningu þáttanna um Georg Bjarnfreðarson og Ólaf Ragnar Hannesson. Þetta elsta og líklega þekktasta sveitahótel á landinu er komið á sjötugsaldur en hefur þó aldrei verið yngra.
Barðstrendingafélagið í Reykjavík reisti Bjarkalund árið 1947 og skyldi hótelið vera áfangastaður á hinni löngu og erfiðu ferð milli landshluta, en þá var á sumrin tveggja til þriggja daga bílferð milli Reykjavíkur og suðursvæðis Vestfjarða. Hótelið stendur í fögru og gróðursælu umhverfi á eiðinu milli Berufjarðar og Þorskafjarðar, rétt við þjóðveginn skammt vestan við afleggjarann út að Reykhólum.
Þáttaröðin Dagvaktin á Stöð 2, framhald Næturvaktarinnar vinsælu, gerðist í Bjarkalundi eins og flestir vita og reyndar víðar í Reykhólahreppi. „Þetta var skemmtilegur en erfiður tími þegar upptökurnar fóru fram og mikið upplifelsi fyrir okkur hérna", segir Árni Sigurpálsson hótelstjóri. „Leikararnir og allir sem voru í kringum þetta voru alveg frábært fólk."
Árni hefur fundið fyrir auknum áhuga á hótelinu eftir að Dagvaktin var sýnd. „Fólk er mjög spennt að sjá staðinn og er mikið að láta mynda sig þar sem ákveðnar senur voru teknar. Þetta er mjög gaman," segir hann.
Bjarkalundur hefur tekið stakkaskiptum á síðustu misserum og nú er opið þar allt árið. Aðstaðan, jafnt utanhúss sem innan, hefur verið stórbætt, eldhúsið tekið í gegn, sjoppan löguð að nútímakröfum og kominn er vísir að smávöruverslun. Matseðillinn er vandaður og vínveitingar í boði. Til viðbótar hótelherbergjum og svefnpokaplássi hafa verið byggð nokkur smáhýsi rétt fyrir ofan hótelið, hvert um sig með eldhúsi, salerni og sturtu. Í Bjarkalundi er bæði netsamband og GSM-samband en svo var ekki til skamms tíma.
Skammt frá hótelinu er tjaldsvæði og vel búin stæði fyrir tjaldvagna, hjólhýsi og húsbíla. Nýtt þjónustuhús með salernum og sturtum hefur verið tekið í notkun. Sjálfsalar eru fyrir bensín og olíu.
Rétt neðan við Bjarkalund er Berufjarðarvatn. Í það rennur Alifiskalækur. Nafn hans er þekkt úr fornritum og mun vera elsti vitnisburður um fiskirækt hérlendis. Í Berufjarðarvatni gefst gestum kostur á því að renna fyrir afkomendur bleikjunnar sem þarna var alin fyrir þúsund árum.
Árni veiðir sjálfur í Berufjarðarvatni í matinn á hótelinu. „Við bjóðum upp á bleikju úr vatninu á veitingastaðnum," segir hann.
Upp af Bjarkalundi eru Vaðalfjöll, tveir samvaxnir og afar sérkennilegir stuðlabergshnjúkar, liðlega 500 m á hæð. Margir ganga þangað upp til að skoða þessa stórfenglegu náttúrusmíð og njóta útsýnisins bæði yfir Breiðafjörðinn og norður yfir Þorskafjörð. Jepplingaslóði liggur frá Bjarkalundi upp undir Vaðalfjöll. Auk þess eru fjölbreyttar gönguleiðir við allra hæfi allt í kring.
Jónsmessuhátíð er haldin í Bjarkalundi á hverju sumri. Hún er fyrst og fremst ætluð fjölskyldufólki sem vill vera í friðsælum fagnaði á öruggum stað með börnunum. Aðeins eru 215 km frá Reykjavík vestur í Bjarkalund og bundið slitlag alla leið.
(Texti og mynd: Helgarblað DV um síðustu helgi / Erla Hlynsdóttir).