Frá Reykhóladögum 2011.

Ákveðið hefur verið að Reykhóladagarnir 2012 verði 26.-29. júlí eða frá fimmtudegi og fram á sunnudag eins og á síðasta ári. Þá voru þeir helgina eftir verslunarmannahelgi en núna verða þeir helgina á undan henni. Ástæðan fyrir þessari breytingu eru athugasemdir eftir hátíðina í fyrra um að of mikið hefði verið um að vera á sama tíma og sérstaklega fyrir börnin. Á helsta umsvifadeginum var bátsferð vegna messu í Flatey og síðan var Ólafsdalshátíðin við Gilsfjörð síðasta daginn. Ákveðið var að færa þessa héraðshátíð fram en ekki aftur vegna þess að þá líður að skólabyrjun.

„Það er mikilvægt að hlusta á allar athugasemdir og ábendingar varðandi Reykhóladagana“, segir Harpa Eiríksdóttir, sem ber hitann og þungann af skipulagi þeirra núna í ár eins og í fyrra. „Ég hvet fólk til að láta mig vita hvað þótti takast vel síðast og hvað miður því að alltaf viljum við gera betur.“

Undirbúningur Reykhóladaga 2012 er þegar hafinn og Hörpu til fulltingis í undirbúningsnefnd verða Lóa á Kambi, Fanney Sif Torfadóttir og Inga Birna sveitarstjóri. Lögð verður sérstök áhersla á að reyna að sjá til þess að allir finni eitthvað við sitt hæfi.

Fyrsti fundur hjá nefndinni verður á þriðjudag og allar tillögur um viðburði á Reykhóladögum í sumar vel þegnar. Hægt er að hafa samband við Hörpu í síma 894 1011 eða senda póst.

„Reykhóladagar eru dagarnir okkar. Því fleiri sem taka þátt í að gera þá eins flotta og mögulegt er, þeim mun skemmtilegri verða þeir“, segir hún.