Leikskólafólkið fyrir dyrum Barmahlíðar.

Úti á túni ...

... og enn úti á túni.

« 1 af 3 »

Mannskapurinn í leikskóladeild Reykhólaskóla brá undir sig betri fætinum núna fyrir hádegið á öskudag og fór í göngutúr um þorpið. Meðal annars var komið við í Barmahlíð og nokkur lög sungin þar í anddyrinu þannig að söngurinn ómaði um heimilið.

Skv. tölum Hagstofu Íslands um mannfjölda núna þann 1. janúar, sem birtar voru í gær, voru í Reykhólahreppi 26 börn á aldrinum 0-5 ára. Kynjaskiptingin var hnífjöfn: 13 stúlkur og 13 drengir.

Þetta er í fullu samræmi við kynjaskiptingu allra íbúanna í hreppnum um áramótin: 140 konur og 140 karlar.

Segið svo að skipulagsmálin í Reykhólahreppi séu ekki til fyrirmyndar!

Myndirnar sem hér fylgja voru teknar annars vegar þar sem hópurinn var á gangi úti á túni og hins vegar fyrir dyrum Barmahlíðar að söngnum loknum. Bæði börnin og kennararnir voru meira og minna í ýmsum sérkennilegum gervum í tilefni dagsins.

► 12.02.2013 Íbúum í Reykhólahreppi fjölgar á ný milli ára