Brynjólfur Smárason tók við gjafabréfinu úr hendi Sveins á Svarfhóli.

Á seinni degi jólamarkaðarins í Króksfjarðarnesi var Björgunarsveitinni Heimamönnum afhentur ágóði af nytjamarkaði Handverksfélagsins Össu sem þar er rekinn á sumrin. Að þessu sinni var um að ræða 60 þúsund krónur, sem fara upp í kaup á fjarskiptabúnaði fyrir björgunarsveitina. Brynjólfur Smárason, formaður Heimamanna, tók við gjafabréfinu úr hendi Sveins Ragnarssonar í stjórn Össu.

Á liðnum árum hefur ágóði af nytjamarkaði Össu runnið til ýmissa félaga og annarra samfélagsmála í héraðinu. Frá 2010 (stundum hefur úthlutun verið skipt) hafa Vinafélag Barmahlíðar, Héraðsbókasafn Reykhólahrepps, Vinafélag Grettislaugar (tvisvar), Kvenfélagið Katla, Björgunarsveitin Heimamenn (tvisvar), Lionsdeildin í Reykhólahreppi, Ungmennafélagið Afturelding og Félagsmiðstöðin Skrefið orðið ágóðans aðnjótandi.

Stjórn Handverksfélagsins Össu skipa Ingibjörg Kristjánsdóttir, Erla Björk Jónsdóttir og Sveinn Ragnarsson.