Nú er ljósmyndasýningin NV Vestfirðir enn og aftur lögð af stað í ferðalag og núna á Stefnumót á Ströndum í Félagsheimilinu á Hólmavík. Sýndar verða myndir prentaðar á striga og aðrar sem prentaðar eru á hefðbundinn ljósmyndapappír. Þetta er fjórði viðkomustaðurinn á Vestfjörðum hjá ísfirska áhugaljósmyndaranum Ágústi G. Atlasyni, en hann hlaut styrk frá Menningarráði Vestfjarða til að fara með þessa sýningu vítt og breitt um Vestfjarðakjálkann. Fyrri áfangastaðir eru Ísafjörður, Norðurfjörður og Tálknafjörður en ýmsir fleiri bíða.

 

Í fyrrasumar ferðaðist Ágúst um Reykhólahrepp og tók fjölda mynda. Að líkindum kemur hann og heldur sýningu á Reykhólum þegar henta þykir.

 

Stefnumót á Ströndum er glæsileg atvinnu- og menningarsýning sem verður opnuð í dag við hátíðlega athöfn en verður síðan opin fram til 15. september.