Ágústa í vitanum í Flateyjarklofningi.

Enn eitt fimmtugsafmælið af mörgum á þessu ári í Reykhólahreppi er í dag, 11. júní. Afmælisbarnið Ágústa Kristín Bragadóttir, Reykjabraut 5, fæddist í Reykjavík en ólst upp í Njarðvík, dóttir Ástu Andersen húsmóður og Braga Guðjónssonar múrara. Systkini hennar: Kristján, búsettur í Svíþjóð, Margrét, búsett í Bandaríkjunum, Jón Halldór, látinn, Einar Bragi, búsettur í Garði, og Elísa Dagmar, búsett í Reykjanesbæ.

Ágústa er gift Birni Samúelssyni frá Höllustöðum í Reykhólasveit og eiga þau þrjú börn, Hildi, Margréti og Samúel Inga. Hún starfar við leikskólann Hólabæ á Reykhólum og rekur ásamt manni sínum fyrirtækið Eyjasiglingu á sumrin. Ágústa er að heiman á afmælinu.