Alls konar ást á Hólmavík
Tónleikar sem bera hið ljúfa heiti Alls konar ást eru fyrsti viðburður Hamingjudaga á Hólmavík þetta árið. Þeir verða í Hólmavíkurkirkju og hefjast kl. 20 á mánudagskvöld, 25. júní. Að tónleikunum stendur kór kirkjunnar ásamt góðu samstarfsfólki og gestum. Efnisskráin er fjölbreytt en eitt er þar þó sammerkt: Fjallað er um ást frá ýmsum hliðum. Þjóðfræðistofa á Ströndum verður með skemmtileg innlegg milli laga og sérstakir gestir eru Gógó-píurnar sem gert hafa garðinn frægan, m.a. á tónlistarhátíðinni Aldrei fór ég suður.
Undirleikari er Stefán Steinar Jónsson og stjórnandi Viðar Guðmundsson. Aðgangseyrir er kr. 2.000 fyrir 13 ára og eldri.
Segja má að Hamingjudögum á Hólmavík sé þjófstartað með þessum upphafstónleikum. Dagskrá þeirra verður að öðru leyti frá 28. júní til 1. júlí eða frá fimmtudegi og fram á sunnudag.
Myndin sem hér fylgir er frá Hamingjudögum 2010. Hún er fengin af hinu ágæta og fjölbreytta myndabloggi Jóns Halldórssonar á Hólmavík.