Alltaf rok á Reykhólum? Algjör vitleysa!
Yngstu nemendurnir í Reykhólaskóla (1.-3. bekkur) gerðu síðustu tvo mánuði eða frá miðjum september og núna fram í miðjan nóvember skipulegar veðurathuganir þrisvar í viku í samfélagsfræðitímum hjá Ástu Sjöfn. Byggt var á upplýsingum frá sjálfvirku veðurstöðinni rétt neðan við Reykhólaþorp sem birtast á vef Veðurstofu Íslands. Athugað var hitastigið, vindhraðinn, vindáttin og skýjafarið svo og úrkoma. Niðurstaðan er þessi: Það er að okkar mati algjör vitleysa að það sé alltaf rok á Reykhólum heldur er eiginlega alltaf gott veður. Reyndar var ekki glaðasólskin nema einu sinni á þessum tíma en oftast hálfskýjað. Fjórum sinnum rigndi og tvisvar snjóaði.
Á fyrstu myndinni er skráningartafla fyrir tímabilið en á hinum eru klippimyndir sem krakkarnir gerðu. Smellið á til að stækka.
Nemendurnir sem unnu þetta verkefni eru:
1. bekkur: Aníta, Margrét, Ketill
2. bekkur: Adrían, Hlynur, Samúel, Sara, Sigurjón
3. bekkur: Solveig, Tindur, Valdimar
Guðjón Sigurðsson, laugardagur 19 nvember kl: 23:03
Þetta hef ég alltaf sagt.Ég hef yfirleitt komið að Reykhólum í yndislegu veðri.
Dásamlegur staður.