Nítján manns auk leikstjórans taka þátt í söngleik sem verið er að æfa hjá Leikfélaginu Skruggu í Reykhólahreppi - „alveg frábært og skemmtilegt fólk“ segir Sólveig Sigríður Magnúsdóttir leikstjóri (Solla Magg). „Upphaflega ákvað ég að leita til Steinunnar Rasmus til að vera með mér að setja upp svolítinn söngleik og fyrir valinu urðu ljóð og lög þeirra bræðranna Jónasar og Jóns Múla Árnasona. Ég fékk kirkjukórinn með í þetta og líka fólk sem ekki er í kórnum. Steinunn Rasmus leikur undir á píanó af sinni snilld.“

 

Frumsýning verður í lok apríl. Enn hefur ekki verið ákveðið hvort verkið verður sýnt í íþróttahúsinu (samkomuhúsinu) á Reykhólum eða í Bjarkalundi við Berufjarðarvatn.

 

Myndirnar sem hér fylgja voru teknar á æfingu í fyrrakvöld.