Frá íbúafundinum með ráðherra í Bjarkalundi fyrir skömmu.

Hreppsnefnd Reykhólahrepps samþykkti í gær ályktun varðandi vegagerð um Gufudalssveit og hefur henni þegar verið komið á framfæri við Ögmund Jónasson innanríkisráðherra, sem fer með samgöngumál í ríkisstjórninni. Undir erindið sem sent var ráðherra ritar Ingibjörg Birna Erlingsdóttir sveitarstjóri. Það hljóðar svo:

„Eftir íbúafund með innanríkisráðherra í Bjarkalundi þann 20. september sl. vill hreppsnefnd Reykhólahrepps senda frá sér eftirfarandi ályktun um vegagerð um Gufudalssveit:

Með tillögu innanríkisráðherra um D-leið yfir Hjallaháls og Ódrjúgsháls er ekki verið að huga að hag og öryggi þeirra sem aka vegina.

Verið er að velja leið með hæsta slysastuðulinn af þeim leiðum sem lagðar hafa verið til. Lögð hefur verið áhersla á láglendisleið með styttingu vegalengda, sem aftur stuðlar að betri samkeppnishæfni, orkusparnaði og ekki síst öryggi vegfarenda.

Verði D-leið tillaga innanríkisráðherra, þá verður það krafa Reykhólahrepps að framkvæmdir á göngum undir Hjallaháls verði settar í forgang og leiðin stytt frekar með þverun Þorskafjarðar.

Reykhólahreppur lýsir sig reiðubúinn til áframhaldandi samráðs um láglendisveg um Gufudalssveit, en íhugar jafnframt hvort gefa eigi framkvæmdaleyfi vegna vegagerðar um fjallvegi, sem hefur í för með sér hærri slysatíðni en sú leið sem samþykkt er í aðalskipulagi hreppsins.“