Anna Greta Ólafsdóttir.

„Önnu Gretu er þakkað það framlag sem hún hefur veitt í þágu Reykhólaskóla síðastliðin tvö ár við sameiningu grunn- og leikskóla. Sveitarstjórn óskar henni jafnframt velfarnaðar á nýjum vettvangi,“ segir í bókun á síðasta fundi sveitarstjórnar Reykhólahrepps, en þar var lagt fram uppsagnarbréf Önnu Gretu Ólafsdóttur skólastjóra. Hún óskar eftir því að starfslok taki gildi 30. júlí. Sveitarstjórn fer þess jafnframt á leit við Önnu Gretu, að hún fylgi eftir málefnum skólans gagnvart nýjum skólastjóra.

Sveitarstjóra var falið að auglýsa starfið. „Ráðningu verði flýtt eins og kostur er, en gera má ráð fyrir að nýr skólastjóri taki til starfa í byrjun ágúst,“ segir í bókuninni.