Arnarsetrið kynnt á aðalfundi F.V. á Reykhólum
Málþing um menningartengda ferðaþjónustu verður haldið í Bjarkalundi á föstudagskvöldið (25. apríl) í tengslum við aðalfund Ferðamálasamtaka Vestfjarða, sem verður haldinn í Grunnskólanum á Reykhólum á laugardag. Að loknum venjulegum aðalfundarstörfum eftir hádegi á laugardag verða kynnt ýmis verkefni í menningartengdri ferðaþjónustu. Meðal annars verður fjallað um Víkingaverkefnið þar sem einkum er byggt á Gísla sögu Súrssonar, Arnarsetur Íslands í Reykhólahreppi og uppbyggingu og framtíðarsýn Hótels Bjarkalundar. Síðdegis verður farið í skoðunarferð um Reykhólasveit í boði heimamanna.
Fundurinn er opinn og eru allir velkomnir að koma og hlýða á fróðleg erindi. Á aðalfundinum sjálfum hafa þeir einir atkvæðisrétt sem eru skráðir í samtökin og hafa greitt árgjald yfirstandi árs til félagsins.
Dagskrána í einstökum atriðum ásamt lögum Ferðamálasamtaka Vestfjarða er að finna hér.