Það myndi kosta tugi milljóna að hleypa umferð á nýja veginn um Arnkötludal milli Gilsfjarðar og Steingrímsfjarðar í vetur, samkvæmt upplýsingum frá Vegagerðinni, og því verður það ekki gert. Vonir voru bundnar við að nýr heilsársvegur, sem leysir fjallveginn um Tröllatunguheiði af hólmi, yrði það vel á veg kominn í haust að hægt yrði að hleypa umferð á hann í vetur. Það hefur ekki gengið eftir. Samkvæmt upplýsingum frá Vegagerðinni hafa framkvæmdir tafist lítillega vegna þess að efni var lakara en búist var við.

Eftir er að leggja efra burðarlag vegarins en engu að síður væri hægt að hleypa á hann umferð. Það þykir hins vegar ekki skynsamlegt þar sem núverandi yfirborð vegarins er afar gróft og hann því seinfarinn.

Þá myndi kosta tugi milljóna að setja upp nauðsynlegar merkingar og sinna lágmarksþjónustu við veginn í vetur. Að mati Vegagerðarinnar hefði einnig verið æskilegt að setja upp vegrið á nokkrum stöðum en það væri þó ekki nauðsynlegt. Vegna þess hvað vegurinn er seinfarinn í núverandi ástandi yrði tímasparnaðurinn við að fara þessa leið lítill sem enginn, að mati Vegagerðarinnar.

Því verður að bíða fram á næsta sumar með að aka um Arnkötludal, en þá verður umferð hleypt á nýja veginn. Framkvæmdum á síðan að vera að mestu lokið næsta haust.

ruv.is