Jólasveinninn heilsar upp á börnin.

Breiðfirðingafélagið heldur að venju árshátíð á þorra og verður hún að þessu sinni rétt í þorrabyrjun, laugardaginn 24. janúar. Veislustjóri verður Davíð Ólafsson en honum til aðstoðar verða þeir Helgi Már Hannesson píanóleikari og Stefán Stefánsson tenórsöngvari. Hljómsveitin Miðaldamenn leikur síðan fyrir dansi fram eftir nóttu. Miðafjöldi á árshátíðina er takmarkaður og aðeins 185 miðar í boði. Tveimur dögum síðar eða mánudaginn 26. janúar verður aðalfundur félagsins haldinn.

Þetta kemur fram í Fréttabréfi Breiðfirðingafélagsins, 1. tölublaði 15. árgangs, sem kom út um miðja vikuna. Þar kemur einnig fram, að félagsvistin hefst á ný sunnudaginn 18. janúar. Námskeið í samkvæmisdönsum hefst 20. janúar og verður haldið á þriðjudagskvöldum fram til 24. mars.

Á vef Breiðfirðingafélagsins er að finna fjölda mynda úr starfinu, þær nýjustu frá jólaskemmtun sem haldin var í Breiðfirðingabúð 27. desember. Meðfylgjandi mynd er úr þeirri syrpu.

Formaður Breiðfirðingafélagsins er Snæbjörn Kristjánsson frá Breiðalæk á Barðaströnd.