Auglýst eftir gömlum myndum
„Mig langar svo að reyna safna saman gömlum ljósmyndum af sem flestum hreppsnefndum hér í sveit, og ekki bara frá þessum sameinaða hreppi heldur líka gömlu hreppunum áður en allt var sameinað hér*. Mig langar að setja flottar myndir í ramma og hengja upp hérna á skrifstofunni,“ segir Björk Stefánsdóttir á skrifstofu Reykhólahrepps. „Líka væri gaman að auglýsa eftir myndum frá merkilegum atburðum hér í sveitum.“
Undir þetta skal tekið heils hugar og hér með er auglýst eftir myndum eins og Björk talar um. Hægt er að senda innskannaðar myndir á netfangið skrifstofa@reykholar.is og líka má koma myndum til Bjarkar til innskönnunar. Æskilegt er að sem bestar upplýsingar fylgi myndum, eftir því sem þær kunna að liggja fyrir. Myndir sem berast yrðu líka birtar hér á vef Reykhólahrepps.
Hér má finna nánari upplýsingar um myndina sem fylgir og skoða jafnframt ýmsar fleiri sem Örn Elíasson læknir frá Reykhólum varðveitir.
*) Núverandi Reykhólahreppur varð til árið 1987 við sameiningu hreppanna fimm í Austur-Barðastrandarsýslu, Geiradalshrepps, Reykhólahrepps, Gufudalshrepps, Múlahrepps og Flateyjarhrepps (Eyjahrepps), sem var á sínum tíma langfjölmennastur þeirra.