Ólína Kristín Jónsdóttir frá Mýrartungu í Reykhólasveit.

„Þetta er tilvalið tækifæri að hitta gamla sýslunga og rifja upp gömul kynni jafnt sem ný“, segir Ólína Kristín Jónsdóttir, ritari Barðstrendingafélagsins í Reykjavík, um fagnað sem félagið heldur í Breiðfirðingabúð við Faxafen 10. mars. Þarna er um að ræða skemmtun og bingó og síðan ball með Láru og gullfiskunum. „Við höfum haldið bingó síðustu ár, sem hefur vakið mikla lukku. Við höfum getað boðið upp á veglega vinninga þar sem mörg fyrirtæki, ekki síst þau sem tengjast Barðastrandarsýslum, hafa af rausnarskap gefið okkur vinninga“, segir Ólína.

Núna er leitað að bingóvinningum en nöfn allra sem gefa vinninga verða birt í Sumarliða pósti, fréttabréfi félagsins, sem borið er út á tæplega 500 heimili.

„Það væri ánægjulegt ef fleiri fyrirtæki og einstaklingar sæju sér fært að styrkja okkur með vinning og fá að launum auglýsingu í Sumarliða pósti“, segir Ólína. Hafa má samband við hana í tölvupósti eða síma 691 1912.

Skemmtunin verður nánar auglýst í Sumarliða pósti sem kemur út um mánaðamótin.

16.12.2011  Ljóðabókin hans Manna í Mýrartungu