Seglbáturinn Vinfastur sem getið er í fréttinni. Mynd: HÞM.

Reykhólamenn eru búnir að ákveða tímasetningu Bátadaganna á nýja árinu. Að þessu sinni verða þeir helgina 11. og 12. júlí. Farið verður á ennþá óvissum fjölda súðbyrðinga frá höfninni á Stað á Reykjanesi á laugardagsmorgni og komið við í eyjum á leiðinni til Flateyjar, þar sem gist verður um nóttina. Að Bátadögum stendur sami hópurinn sem undanfarin ár hefur unnið að uppbyggingu Bátasafns Breiðafjarðar á Reykhólum (sjá ítarefni í fréttum sem tengt er við hér fyrir neðan). Vonast er til þess að sem flestir sem hafa yfir súðbyrtum sjófærum trébátum að ráða, gömlum sem nýjum, komi og verði með í ferðinni.

Að sögn Aðalsteins Valdimarssonar á Reykhólum (betur þekktur sem Steini Vald), helsta drifkraftsins í Bátasafni Breiðafjarðar og þá jafnframt Bátadögum, er ætlunin að bátarnir verði komnir í höfnina á Stað á föstudagskvöldi og síðan verði farið út um eyjar daginn eftir. Trúlega verði komið við í Hvallátrum og Skáleyjum og komið seinni hluta dags út í Flatey. Að líkindum verða þar einhverjir fyrirlestrar eða vísir að málþingi um gamla báta. Gist verði í Flatey og verður þá hver að útvega sér gistingu og viðurgerning sjálfur. Daginn eftir, sunnudag, verði farið aftur í land og tekin höfn á Stað.

Ekki verður hægt að taka almenna farþega í þessa báta, enda eru þetta ekki löglegir fólksflutningabátar, heldur geta einungis kunningjar fengið að fljóta með, að sögn Aðalsteins. Hins vegar verður Björn Samúelsson hjá Eyjasiglingu á Reykhólum í ferðum á sínum hraðskreiða farþegabáti eins og endranær og flytur hann farþega út í Breiðafjarðareyjar í tengslum við Bátadaga. Þórður Jónsson í Árbæ mun verða á hraðbáti sínum í samfloti með trébátunum á leiðinni út í eyjar og til baka, þeim til öryggis. Allt fer þetta samt eftir veðri. Eða eins og segir á einum stað: Kóngur vill sigla en byr hlýtur að ráða.

Í þessari ferð verða nokkrir gamlir bátar í eigu Bátasafns Breiðafjarðar á Reykhólum og aðrir nýrri. Steini Vald segist skora á sem allra flesta eigendur og umráðamenn súðbyrðinga að koma og vera með á breiðfirskum bátadögum. Fyrir utan vélbáta verður hinn nýsmíðaði seglbátur Vinfastur að líkindum með í ferðinni. Vinfastur er eftirmynd Staðarskektunnar svokölluðu og fór í sína fyrstu siglingu á liðnu sumri og höfðu menn þá af að hvolfa honum langt úti á Breiðafirði (sjá tengil hér fyrir neðan). Áður hafði hann að vísu verið settur á flot en þá varð honum ekki siglt þar sem ekki byrjaði þann dag, heldur var stafalogn. Steini segir að Vinfastur myndi aldrei geta fylgt vélbátunum eftir, jafnvel þótt vel byrjaði. Annað hvort yrði hann hafður í spotta eða þá að hann legði af stað á undan öðrum.

______________________________________

Sjá einnig skyldar fréttir:

29.04.2008 > Bátasafn Breiðafjarðar - sögulegum verðmætum bjargað

06.06.2008 > Bátasafn Breiðafjarðar leitar eftir liðsauka

08.06.2008 > Lentu í sjónum í reynslusiglingunni

04.07.2008 > Bátadagar á Reykhólum um helgina

13.08.2008 > Engan veginn elsti nothæfi Breiðfirðingur landsins

26.08.2008 > Fjölbreytt dagskrá á Reykhóladeginum á laugardag