Myndarleg framlög komu í hlut vestfirskra verkefna þegar úthlutað var úr Þjóðhátíðarsjóði í fyrradag í þrítugasta og fjórða og jafnframt síðasta sinn. Félag áhugamanna um Bátasafn Breiðafjarðar á Reykhólum fékk einn af hæstu styrkjunum sem veittir voru eða eina milljón króna. Styrknum er ætlað að verja til að lagfæra hús í eigu Reykhólahrepps, setja upp safn báta, verkfæra og annarra muna sem tilheyra bátasmíði og endursmíða gamlan bát sem verður til sýnis á safninu.

 

Vesturbyggð hlaut kr. 400.000 til að leggja stíga og setja upplýsingaskilti við friðlýstar fornleifar sem kenndar eru við Hrafna-Flóka við Brjánslæk á Barðaströnd. Melrakkasetur Íslands í Súðavík fékk 600.000 krónur til að ljúka við hönnun sýningar um eina af elstu launuðu starfsstéttum Íslendinga, refaveiðimenn. Þrísker ehf. fékk 600.000 krónur til að endurbyggja Hraðfrystihúsið í Flatey.

 

Tilgangur sjóðsins hefur verið að veita styrki til stofnana og annarra, er hafa það verkefni að vinna að varðveislu og vernd þeirra verðmæta lands og menningar, sem núverandi kynslóð hefur tekið í arf. Við það er miðað, að styrkir úr sjóðnum verði viðbótarframlög til þeirra verkefna, sem styrkt eru, en verði ekki til þess að lækka önnur opinber framlög til þeirra eða draga úr stuðningi annarra við þau.

 

Alls bárust 273 umsóknir um styrki að fjárhæð samtals um 418 milljónir króna. Á landsvísu var úthlutað 59 styrkjum að fjárhæð samtals 35 milljónir króna.

 

Vefur Bátasafns Breiðafjarðar

Meira um Bátasafn Breiðafjarðar á Reykhólum