Aðalsteinn Óskarsson, framkvæmdastjóri Fjórðungssambandsins.

Sértækar aðgerðir eins og þær sem ríkisstjórnin samþykkti fyrir Norðurland vestra fyrir helgi kalla á skýrari aðferðafræði í byggðamálum, segir Aðalsteinn Óskarsson, framkvæmdastjóri Fjórðungssambands Vestfirðinga. Ríkisstjórnin samþykkti fyrir helgi fimmtán verkefni svokallaðrar Norðvesturnefndar til að bregðast við neikvæðri byggðaþróun á Norðurlandi vestra. Aðalsteinn segir að stefna stjórnvalda sé ekki skýr:

„Maður sér ekki alveg hvaða aðferðafræði stjórnvöld ætla að beita í byggðamálum, er það með svona beinum, miðstýrðum aðgerðum eða ætla menn að efla landsvæðin í að taka ákvarðanir á eigin forsendum og fylgja því eftir?“

Þetta kemur fram á vef RÚV. Þar kemur þetta einnig fram efnislega:

Aðalsteinn segir að á Vestfjörðum og víðar hafi verið unnið eftir sóknaráætlun sem landshlutasamtök sveitarfélaga hafa lagt áherslu á og byggist á samráði í héraði. Hins vegar eigi samkvæmt fjárlögum ekki að efla þessa sóknaráætlun.

Aðalsteinn bendir á, að í fréttatilkynningu forsætisráðuneytisins hafi aðgerðirnar á Norðurlandi vestra verið bornar saman við sértækar aðgerðir á Vestfjörðum. Hann segir það ekki vera samanburðarhæft, þar sem í aðgerðunum á Vestfjörðum hafi verið unnið að ofanflóðavörnum og vegasamgöngum en ekki aðgerðum eins og þeim sem nú stendur til að ráðast í á Norðurlandi vestra til að auka atvinnumöguleika.