Símenntunarmiðstöðin á Vesturlandi minnir á fyrirlestur með ofanrituðum titli, sem haldinn verður í Auðarskóla í Búðardal 9. apríl. Þarna ræðir Jóhanna Magnúsdóttir guðfræðingur og kennari um mikilvægi þess að lifa af heilu og opnu hjarta - „að losa sig við þennan níðþunga skráp sem oft vill hlaðast upp, skráp sem getur lokað á vondar tilfinningar en um leið lokað á möguleikann til að finna góðar tilfinningar, þiggja þær og gefa“.

Yfirskriftin er sótt í ljóð Páls Óskars, Betra líf, þar sem hann syngur „ég opnaði augun og hjartað fann á ný betra líf“.

Í framhaldi af því er spurt: „Erum við ekki öll með opin augun, hvað þá hjartað? Ef ekki, hvernig förum við þá að því og hvað breytist við það? Er ekki bara betra og öruggara að lifa með lokað hjarta og finna minna til?“

Fyrirlesturinn verður þriðjudagskvöldið 9. apríl kl. 19.30 til 21. Aðgangur er ókeypis en nauðsynlegt að skrá sig á simenntun.is.