María Maack var tekin á orðinu: Núna er komin hér á Reykhólavefinn samflotssíða (Ferða-Flot, eins og María kallaði það) þar sem líka má koma á framfæri hvers konar smáauglýsingum (með vissum skilyrðum eins og þar kemur fram). Ekki síst ætti þetta að geta verið nytsamt héraðsfólki á meðan engin verslun er á Reykhólum. Hægt er að fara inn á þessa síðu með því að smella á kassann hér hægra megin (sjá meðfylgjandi skjáskot) og reyndar líka í valmyndinni til vinstri.

Ekki er ljóst á þessari stundu hvort hægt er nema með miklu veseni að snúa við röðinni á innleggjunum á þessari einu síðu, þannig að það nýjasta hverju sinni sé efst. Það kemur brátt í ljós. Annars verður bara að skruna niður og síðan verður færslunum eytt þegar hæfilegur tími er liðinn.

Þetta er tilraun; annað hvort notar fólk þetta eða ekki, eins og gengur. Ef ekki, þá verður þessi síða einfaldlega látin hverfa. Sakar ekki að prófa.