Kirkjurnar tvær á Reykhólum árið 1959. Sjá nánar í meginmáli.

Sr. Agnes M. Sigurðardóttir biskup Íslands predikar og þjónar fyrir altari ásamt sr. Elínu Hrund Kristjánsdóttur sóknarpresti við hátíðarguðsþjónustu á Reykhólum á sunnudaginn eftir viku, 8. september, þegar minnst verður hálfrar aldar vígsluafmælis Reykhólakirkju. Kirkjan er helguð minningu Þóru Einarsdóttur í Skógum við Þorskafjörð, móður þjóðskáldsins sr. Matthíasar Jochumssonar.

Ítarlega verður greint frá afmælisathöfninni hér á vefnum um eða eftir miðja vikuna, svo og kirkjum og prestum á Reykhólum fyrr og síðar og kirkjugripum á Reykhólum fyrr og síðar.

Myndin sem hér fylgir er úr safni Húsameistara Íslands á Þjóðskjalasafni, tekin sumarið 1959. Nýja kirkjan í smíðum en fjær er gamla kirkjan, sem núna þjónar með glæsibrag í Bæ (Saurbæ) á Rauðasandi við utanverðan Breiðafjörð norðanvert.