Hótel Bjarkalundur við Berufjarðarvatn. Eigandi myndar: Unnsteinn H. Ólafsson.

Vegna 65 ára afmælis Hótels Bjarkalundar 29. júní í sumar vilja eigendurnir biðla til þeirra sem gætu átt gamlar myndir og upplýsingar frá fyrri tíð, með það í huga að lána myndirnar til að skanna þær inn. Hugmyndin er að setja upp sögu Bjarkalundar í máli og myndum og sýna með myndvarpa og á annan hátt. „Við erum búin að hafa samband við Barðstrendingafélagið, sem auðvitað var frumkvöðullinn að stofnun og byggingu þessa elsta sumarhótels landsins. Þar hefur bón okkar verið tekið mjög vel og fólk ætlar að aðstoða okkur eftir bestu getu“, segir Kolbrún Pálsdóttir hótelstýra.

„Til að geta gert afmælið sem veglegast - og helst látið það standa í viku að fornum sið - leitum við aðstoðar fólks, bæði hér í Reykhólasveit og annars staðar, sem starfað hefur í Bjarkalundi einhvern tímann á þessum 65 árum og gæti átt góðar myndir, bæði innan húss og utan, og á jafnvel góðar sögur frá veru sinni í Bjarkalundi.“

Myndir gætu farið í umslag ásamt nafni, heimilisfangi og símanúmeri með utanáskriftinni Hótel Bjarkalundur, 380 Reykhólum. Lofað er góðri meðferð og skilvísi á öllum myndum til baka. Líka  er hægt að hafa samband við Kolbrúnu í síma 894 1295.

Afmælishátíð Bjarkalundar verður auglýst nánar þegar nær dregur sumri.

Smellið á myndina til að stækka. Hún er ekki alveg ný.