Bjarkalundur auglýstur til sölu
Í fasteignakálfinum í helgarblaði Fréttablaðsins er hálfsíðu auglýsing (mynd nr. 1) þar sem segir meðal annars:
Til sölu Hótel Bjarkalundur og tilheyrandi eignir ásamt 58,5 hektara jörð á einum fallegasta stað landsins, margar náttúruperlur eru í nánasta umhverfi. Fasteignir á landareigninni eru alls 9 talsins, samtals 1.015 fm. og skiptast í hótel, þjónustumiðstöð, 6 smáhýsi og starfsmannahús. Samtals gistirými er fyrir yfir 50 manns og miklir stækkunarmöguleikar.
Berufjarðarvatn sem er um 15 hektarar er á landareign Bjarkalundar. Þar er silungsveiði. Alifiskalækur rennur í vatnið (mynd nr. 2). Nafn sitt dregur hann af fyrsta fiskeldi sem vitað er um hérlendis.
Meðal hinna lítt þekktari Íslendingasagna er Gull-Þóris saga, öðru nafni Þorskfirðinga saga. Þar segir á einum stað: „Þeir tóku fiska úr vatninu og báru í læk þann er þar er nær og fæddust þeir þar. Sá heitir nú Alifiskalækur.“ Litlu síðar segir: „Þá réð Haraldur konungur hárfagri fyrir Noreg.“ Ef frásögn þessi er rétt, þá hefur fiskeldi þetta átt sér stað á landnámsöld.