„Ég er sannfærður um að þetta verði skemmtilegt ár. Mér heyrist á fólki í þessum geira að það ætli að halda fullum dampi þetta árið“, segir Jón Jónsson, menningarfulltrúi Vestfjarða, aðspurður hvernig komandi ár í vestfirskri menningu líti út. Að sögn Jóns var síðasta ár feikilega öflugt menningarlega séð og mikið um að vera. Segist hann bjartsýnn á að árið 2010 verði einnig öflugt. „Það eru þó ýmis merki þess að erfiðara verði að ná inn peningum vegna menningarstarfsins í ár en við eigum eftir að sjá til hvernig það þróast. Opinberir aðilar eru að draga saman og það er miklu erfiðara að eiga við einkaaðila sem hafa undanfarin ár stutt dyggilega við menningarstarf.“

 

Samningur um menningarráð rann út um áramótin en búist er við að hann verði endurnýjaður fljótlega. „Það er gert ráð fyrir menningarsamningum í fjárlögum þó ekki sé búið að negla niður hversu mikið fjármagn mun renna til menningarráða. Það er þó nokkuð víst að um niðurskurð verði að ræða.“

 

Jón segir þó búist sé við að heildarstuðningur menningarráðsins til verkefna dragist ekki saman. „Við eigum enn inni peninga frá fyrri úthlutunum vegna verkefna sem ekkert varð úr. Þegar það gerist nýtast peningarnir sem annars hefðu farið í þessi verkefni til nýrra verkefna.“

 

Jón segir mörg stór verkefni vera á döfinni í tónlist, leiklist og menningartengdri ferðaþjónustu. „Ef allt gengur vel verða opnaðar tvær nýjar sýningar í ár, Melrakkasetur í Álftafirði og Arnarsetur í Króksfjarðarnesi. Það mun því bætast ærlega við flóruna í menningar- og náttúrutengdri ferðaþjónustu.“

 

Þetta kom fram á fréttavefnum bb.is á Ísafirði.