Breiðfirðingakórinn í Bjarkalundi á sunnudag
Breiðfirðingakórinn, sem er blandaður 50 manna kór, tekur lagið í Bjarkalundi í Reykhólasveit kl. 15 á sunnudag, 10. maí. Öllum íbúum Reykhólahrepps og nágrönnum er boðið að koma og heyra hvað kórinn hefur að bjóða af léttri og líflegri dagskrá sinni. Einsöngvari er Davíð Ólafsson bassi, undirleikari Helgi Már Hannesson og stjórnandi Hrönn Helgadóttir.
Söngskemmtun þessa heldur Breiðfirðingakórinn þegar hann hefur viðkomu í Bjarkalundi á leiðinni suður, en á morgun kl. 16 heldur hann vortónleika í Félagsheimilinu á Patreksfirði. Þar flytur kórinn fjölbreytta, létta og sérlega skemmtilega söngdagskrá með lögum meðal annars eftir Bítlana, Bubba Morthens og Sigfús Halldórsson, auk höfunda laga og ljóða úr Dölum og margra annarra. Þá verða flutt nokkur falleg lög úr söngleikjum og þekktar íslenskar söngperlur.
Í Bjarkalundi ætlar kórinn að syngja úrval úr dagskrá vortónleikanna. Enginn aðgangseyrir verður á þeirri söngskemmtun og vonast kórinn til að sjá sem flesta.