Breiðfirskur beitukóngur dafnar af dauðri síld
Eins dauði er annars brauð, segir máltækið, og það á vissulega við um beitukónginn á Breiðafirði, sem nýtur þess nú að síld hefur verið að drepast þar í stórum stíl, eins og segir á vef Ríkisútvarpsins í gær. Sjávarrannsóknarsetrið Vör í Ólafsvík annast rannsóknir á beitukóngi á Breiðafirði en veiðar á honum eru hvergi annars staðar stundaðar hér við land. Erla Björg Örnólfsdóttir, forstöðumaður Varar, segir aldrei nóg af beitukóngi. Hann hafi staðið undir allt frá 600 til 1000 tonna veiði á ári.
Ekki sé hins vegar hægt að segja til um hversu lengi hægt sé að veiða svo mikið og afkoma beitukóngs frá ári til árs hafi ekki verið rannsökuð. Hins vegar megi kannski nefna að ekki sé ástæða til að óttast um afkomu beitukóngsins, því sé það rétt að síld sé að drepast úr sýkingu í Breiðafirði um þessar mundir, þá komi það sér vel fyrir beitukónginn.
Beitukóngur sé lúxusvara annars staðar í Evrópu þó að hann sé það ekki hér. Það sé kannski vegna þess að Íslendingar hafi ekki kynnt sér nýtingu hans og bragðgæði nógu vel. Reyktur beitukóngur sé til dæmis algjört hnossgæti. Undanfarið hafi sala á beitukóngi verið erfið. Hann hafi aðallega verið seldur til Evrópulanda og Asíu og unnið sé að því að finna markaði fyrir hann víðar.
Myndirnar eru af alfræðivefnum Wikipedia.
Sjá einnig:
Skessuhorn 06.05.2008 > Sjávarrannsóknasetrið Vör er Frumkvöðull ársins