Brottför að loknum sumarverkum
Gunnbjörn Óli Jóhannsson verktaki frá Kinnarstöðum í Reykhólasveit (Kolur ehf. í Búðardal) fór núna fyrir helgina með tæki sín frá Reykhólum að loknum ýmsum verkum kringum Reykhólaskóla í sumar og haust, sem hér verður innan tíðar greint frá í máli og myndum. Með í för á flutningavagninum var dráttarvél sem var að fara í skemmuna á Kinnarstöðum til vetursetu eftir sumardvöl í dráttarvélahópnum mikla á Grund og þátttöku í Reykhóladögum. Unnsteinn Hjálmar Ólafsson (Hjalli á Grund) kom akandi á henni ofan frá Grund og beint upp á vagninn þar sem myndirnar voru teknar.
Dráttarvélin er Ferguson árgerð 1949 og var í eigu Kinnarstaðasystra, uppgerð á fimmtugsafmælisárinu 1999. Hún er með bensínvél og ber skráningarnúmerið Bd-7.
Með Gunnbirni á myndunum eru tveir af starfsmönnum hans, þeir Arnar Ólafsson og Guðjón D. Gunnarsson (Dalli), og Unnsteinn á Grund.