Búið að opna verslunina á Reykhólum
Hólabúð á Reykhólum var opnuð kl. 13 í dag og lauk þar með verslunarleysi í héraðinu sem staðið hefur frá áramótum. Ingibjörg Birna Erlingsdóttir sveitarstjóri mætti á slaginu þegar opnað var og færði verslunareigendunum Ásu Fossdal og Reyni Þór Róbertssyni blómvönd og óskaði þeim velfarnaðar. Í tilefni dagsins blakti íslenski fáninn við hún bæði hjá búðinni og við Stjórnsýsluhúsið á Reykhólum. Við búðina var líka hennar fáni, sem betur má sjá á mynd nr. 3.
Fyrst um sinn verður Hólabúð opin virka daga kl. 10-18 og laugardaga kl. 10-16 en lokað verður á sunnudögum. Afgreiðslutíminn verður svo endurskoðaður með vorinu.
Á Facebook-síðu Hólabúðar má fylgjast með tilboðum og öðru sem þar er fréttnæmt hverju sinni.
Ingi B Jónasson, fimmtudagur 26 mars kl: 17:29
til hamingju með búðina ,næst þarf að huga að stað þar sem allir ungir sem gamlir geta komið saman spjallað drukkið kaffi ,gos eða ölkollu og jafnvel fleira