Stofnfundur Byggðasamlags um málefni fatlaðs fólks var haldinn í Þróunarsetrinu á Ísafirði í morgun. Á fundinum var samþykktur samningur um stofnun samlagsins, sem hafa mun yfirumsjón með málaflokknum þegar hann færist frá ríki til sveitarfélaga um áramót. Aðilar samlagsins eru Bolungarvíkurkaupstaður, Ísafjarðarbær, Súðavíkurhreppur, Strandabyggð, Kaldrananeshreppur, Árneshreppur, Reykhólahreppur, Tálknafjarðarhreppur og Vesturbyggð.

 

Á meðfylgjandi mynd rita undir samninginn Daníel Jakobsson bæjarstjóri f.h. Ísafjarðarbæjar og Vesturbyggðar, Ómar Már Jónsson sveitarstjóri f.h. Súðavíkurhrepps, Elías Jónatansson bæjarstjóri f.h. Bolungarvíkurkaupstaðar, Albertína Friðbjörg Elíasdóttir formaður Fjórðungssambands Vestfirðinga f.h. Tálknafjarðarhrepps, og Aðalsteinn Óskarsson framkvæmdastjóri Atvinnuþróunarfélags Vestfjarða f.h. Strandabyggðar, Kaldrananeshrepps, Árneshrepps og Reykhólahrepps.