Um jólin 1951 var haldin barnaskemmtun á Reykhólum og Sigfús Halldórsson tónskáld fenginn til að leika jólasvein. „Þá varð ég heldur betur var við að Litla flugan var auðlærð,“ sagði hann seinna í viðtali. „Ég var ekki búinn að syngja hana nema einu sinni þegar allir krakkarnir sungu hana með mér.“ Sigfús hefur sagt að lagið hafi verið sungið „fram og aftur og út á hlið, liggur mér við að segja, og ég vænti þess, að hún hafi svipt einhverjum skammdegisdrunga á brott.“

Á jóladag fyrir tveimur árum voru hér á vefnum rifjuð upp undir ofanritaðri fyrirsögn atvik þess er Sigfús samdi á nokkrum mínútum lagið við ljóð Sigurðar Elíassonar tilraunastjóra á Reykhólum, Litlu fluguna. Þar má lesa ítarlega samantekt Jónasar Ragnarssonar ritstjóra um lagið og ljóðið og höfunda beggja. Núna á jólum er kannski ekki úr vegi að rifja þetta upp. Skyldi Litla flugan ennþá vera sungin á skemmtunum á Reykhólum?