Við Hólabæ á liðnu vori.

Opið hús fyrir alla íbúa Reykhólahrepps verður á leikskólanum Hólabæ á Reykhólum á morgun, föstudaginn 6. febrúar. Börn og starfsfólk bjóða gestum að koma og skoða handaverkin sín og spjalla á meðan þegin er svolítil hressing. Hinn 6. febrúar ár hvert er haldið upp á Dag leikskólans um land allt til að vekja athygli á því starfi sem þar fer fram. Hver leikskóli hefur frjálsar hendur um hvað gert er hverju sinni af þessu tilefni.

Að undanförnu hefur mannskapurinn á Hólabæ verið að læra um Reykhóla með áherslu á jarðhita og annað sem er einkennandi fyrir staðinn. Börnin og starfsfólkið vona að þess sjáist merki á því sem eftir þau liggur þegar gestirnir koma í heimsókn.

Hólabær verður opinn gestum kl. 10-11.30 fyrir hádegi og kl. 13-16 eftir hádegi á Degi leikskólans á morgun.