Einleikurinn Draugasaga sem Leikfélag Hólmavíkur setti upp síðasta haust verður fluttur einu sinni enn á Sauðfjársetrinu í Sævangi við Steingrímsfjörð núna á laugardagskvöld, 13. ágúst. Leikritið var sérstaklega skrifað fyrir sýningar í Sævangi. Sýningin að þessu sinni hefst kl. 22 og tekur klukkustund.

Áhorfendur kynnast húsdraugnum sem heldur til í Sævangi og hann segir sögur af öðrum draugum af Ströndum sem hann hefur orðið samferða gegnum tíðina. Hægt og sígandi kemur hans eigin ógæfusaga fram í skímuna. Leikritið er dálítið óhugnanlegt og ekki við hæfi ungra barna.

Þessi sýning á leikritinu kemur í framhaldi af því að stykkið verður sýnt á einleikjahátíðinni Act alone þetta árið, nánar tiltekið í kvöld, fimmtudagskvöldið 11. ágúst kl. 22 í félagsheimilinu á Suðureyri við Súgandafjörð.

Það er Arnór Jónsson frá Kirkjubóli á Ströndum sem leikur drauginn í einleiknum, en faðir hans, þjóðfræðingurinn Jón Jónsson á Kirkjubóli, er höfundur verksins og leikstjóri.

Miðapantanir fyrir sýninguna í Sævangi eru í síma 693-3474 (Ester) og aðgangseyrir 1.800 krónur.