Áhugahópur fólks á Vestfjörðum hefur ákveðið að efna til hátíðahalda vegna þeirra tímamóta, að 50 ár verða í haust síðan vegur var lagður um Dynjandisheiði og akvegasamband komst á milli byggðarlaga á Vestfjörðum og milli Reykjavíkur og Ísafjarðar. Jafnframt er vakin athygli á því að þörf er á áframhaldandi framförum í vegagerð til þess að tengja saman byggðir með fullnægjandi hætti miðað við kröfur nútímans. Ætlunin er að koma saman á Dynjandisheiði af þessu tilefni fimmtudagskvöldið 16. júlí milli kl. 19 og 21. Það er einlæg von hópsins að sjá helst alla sveitarstjórnarmenn á Vestfjörðum og auðvitað sem flesta Vestfirðinga og aðra landsmenn við þessi tímamót.

 

Dagskrá verður send út síðar, svo og frekari tilkynningar.

 

Hópurinn nýtur stuðnings sveitarfélaga og ýmissa samtaka á Vestfjörðum.

 

Talsmenn hópsins sem veita frekari upplýsingar um málið eru:

- Sigmundur Þórðarson, Þingeyri, vasasími 863 4235.

- Magnús Ólafs Hansson, Patreksfirði, vasasími 868 1934.

 

Á vefnum vegur.is er eftirfarandi texta að finna:

 

Gerð vegar um Dynjandisheiði lauk 1959. Með vegarlagningunni var lítt hugsað um snjóalög því ekki var gert ráð fyrir vetrarnotkun. Vegurinn fer mest í um 500 metra hæð við sýslumörk á hinni eiginlegu Dynjandisheiði og í 468 metra í Helluskarði. Á milli er vegurinn lægri og fer í 300 metra hæð þar sem lægst er í Trölladölum. Heiðin er mjög löng, t.d. eru 12 km úr Helluskarði norður á sýslumörk á háheiðinni. Á löngum köflum liggur vegurinn um mishæðótt landslag. Vegurinn er missnjóþungur eftir köflum.

Það sem lokast gjarnan fyrst á haustin eru sneiðingarnir upp úr Arnarfirðinum, bæði efst í Dynjandisdal og upp úr Afréttisdalnum. Einnig getur lokast fljótt í sneiðingi undir Botnshestinum. Á vorin er mikið um stórar fannir uppi á heiðinni en minni snjór á milli. Vonlítið er að halda núverandi vegi opnum. Ekki eru snjóflóð þekkt uppi á heiðinni en þau koma hins vegar í sneiðinginn upp úr Dynjandisdalnum. Sjálfsagt geta komið smásnjóflóð í sneiðinginn upp úr Vatnsfirði og undir Botnshestinum.