Fjórir staurar eru brotnir í raflínu Orkubús Vestfjarða um Gufudalsháls yfir í Kollafjörð. Þess vegna er ekkert fjarskiptasamband (Tetra-samband) á Klettshálsi. Ekki er vitað hvenær hægt verður að gera við línuna en til þess þarf væntanlega að flytja þangað öflug tæki. Engir bæir eru lengur í byggð í Kollafirði. Rafmagn frá landskerfinu komst síðdegis í gær í allar byggðir í Reykhólahreppi þegar lokið var viðgerð á línu Landsnets á Sælingsdalsheiði í Dalasýslu.

Þar með lauk dísilkeyrslu í varastöðinni á Reykhólum að sinni og reyndi því ekki til þrautar á olíubirgðirnar þar.