En vert er að geta um vandamál Breta
Komið er hér á vefinn nokkurt safn af limrum eftir Eystein G. Gíslason (Eystein í Skáleyjum). Í vöggugjöf fékk hann leikandi hagmælsku og bæði lausavísurnar hans og limrurnar flugu víða, en núna er hann aldraður orðinn og hættur að yrkja. Eysteinn var bóndi og ekki síst hlunnindabóndi í Skáleyjum á Breiðafirði en líka var hann kennari á Flateyri um árabil.
Eysteinn í Skáleyjum er líklega í hópi fremur fárra sem hafa verið í sveitarstjórn á fleiri en einum stað. Annars vegar átti hann sæti í hreppsnefnd á Flateyri og hins vegar í Flateyjarhreppi sem síðar varð hluti hins sameinaða Reykhólahrepps. Eysteinn var meðal stofnenda Skáksambands Vestfjarða árið 1976 og var kosinn í fyrstu stjórn þess.
Gjarnan orti Eysteinn limrur um málefni líðandi stundar, innan lands sem utan, og nefndi þær „fréttamyndir teknar með flassi“.
Á fyrri myndinni sem hér fylgir er Eysteinn á bátnum Kára árið 1986, fyrir fjórðungi aldar. Á mynd nr. 2 er hann staddur úti í Drangey á Skagafirði árið 1998.
Hér skulu tilfærðar tvær af limrum Eysteins en að öðru leyti vísað í Gamanmál af ýmsu tagi í valmyndinni hér vinstra megin: Limrur eftir Eystein í Skáleyjum.
Hátignir
Hugþekkar hefjast til skýjanna
hátignir Dana og Svíanna.
En vert er að geta
um vandamál Breta:
Vesalings Kalli og Díana!
Járnkarl
Af ótta við kvalræði hvellt hrín
kvíðandi aftöku gelt svín.
En háskanum storkar
og heilmiklu orkar
rússneski járnkarlinn Jeltsín.
Sjá hér á Ljósmyndasíðu Rikka fróðleik um bátinn Kára, sbr. mynd nr. 1, og myndir frá endursmíði hans allt til þessa dags.