Norðvesturkjördæmi.

Síðasta helgi var mesta prófkjörshelgin í aðdraganda kosninganna 25. apríl og liggur nú nokkuð ljóst fyrir hverjir munu skipa efstu sætin á mörgum framboðslistum þeirra flokka sem nú eiga sæti á Alþingi. Eitt prófkjör er þó eftir og það sem e.t.v. er beðið með hvað mestri spennu. Það er prófkjör sjálfstæðismanna hér í Norðvesturkjördæmi, þar sem sautján frambjóðendur eru í boði og sex af þeim kljást um oddvitasætið. Prófkjörið fer fram á laugardag og talningin hefst á sunnudagsmorgun.

Í ljósi útkomunnar úr þeim prófkjörum sem farið hafa fram lítur út fyrir að endurnýjun í þingmannaliðinu verði á landsvísu nokkru minni en ýmsir höfðu e.t.v. búist við. Hins vegar lítur út fyrir að mesta endurnýjunin geti orðið hér í NV-kjördæmi. Nú þegar liggur fyrir að liðlega helmingur þingmanna kjördæmisins að minnsta kosti verður nýr.

Miðað við núverandi skiptingu þingsæta verður annar þingmanna Samfylkingarinnar í NV-kjördæmi nýr á þingi, Ólína Þorvarðardóttir. Sömuleiðis er nokkuð ljóst að Framsóknarflokkurinn fær a.m.k. einn nýjan þingmann, Gunnar Braga Sveinsson. Nái Frjálslyndi flokkurinn að halda sínum tveimur mönnum kemur Sigurjón Þórðarson aftur inn á þing eftir fjarveru frá síðustu kosningum. Þá er öruggt að fái Sjálfstæðisflokkurinn þrjá þingmenn eins og í síðustu kosningum verða að minnsta kosti tveir þeirra nýir á þingi. Hverjir það eru kemur hins vegar ekki í ljós fyrr en eftir skipan á framboðslistann að loknu prófkjörinu um helgina.

Það liggur því fyrir að af níu þingmönnum kjördæmisins verða að minnsta kosti fimm nýir og hugsanlega sex og í mesta lagi sjö.

- Byggt á samantekt Svæðisútvarps Vestfjarða.