Leikfélagið Skrugga í Reykhólahreppi var endurvakið núna í haust en félag með sama nafni starfaði í héraðinu á árum áður. Formaður hinnar nýju Skruggu er Sólveig Sigríður Magnúsdóttir, líklega betur þekkt sem Solla Magg. Með henni í stjórn eru Ingibjörg Þór og Björk Stefánsdóttir en varamenn eru sr. Elína Hrund Kristjánsdóttir og Andrea Björnsdóttir. Eins og ráða mætti af skipan stjórnar eru konur í miklum meirihluta í hinu nývakta leikfélagi. Á stofnfundinn komu fjórtán manns, þrettán konur og einn karl, en það var Gústaf Jökull Ólafsson, oddviti Reykhólahrepps. Síðan hafa fimm manns bæst í félagið, þar af tveir karlar, þannig að nú eru nítján manns í Skruggu.

Að sögn Sollu Magg hafa drög verið lögð að starfi félagsins á næstunni. Hinn 16. desember er ætlunin að vera með sérstakan dag fyrir börnin í húsnæði Hlunnindasýningarinnar á Reykhólum. Fyrirhugað er að trúbadorinn Hörður Torfason komi á næstunni og haldi tónleika. Áformaðar eru óvæntar uppákomur núna í nóvember og desember en ekki er gefið upp fyrirfram hvað þar verður á ferðinni. Eftir áramótin er síðan ætlunin að setja upp leiksýningu en ekki er búið að ákveða hvaða leikverk það verður.

Vel væri þegið að fá upplýsingar um Skruggu hina fyrri í athugasemdadálkinum hér fyrir neðan eða í netpósti.