„Enn á að tefja möguleikana á vegabótum“
Bæjarstjórn Vesturbyggðar mótmælir harðlega aðförinni að samfélaginu á sunnanverðum Vestfjörðum með umsögn Skipulagsstofnunar um vegagerð á Vestfjarðavegi 60 frá Eiði í Vattarfirði að Þverá í Kjálkafirði. Með umsögn sinni leggst Skipulagsstofnun eindregið gegn vegagerð á svæðinu. Skipulagsstofnun er í raun að leggja til gamaldags vegagerð sem er óöruggari og alls ekki í samræmi við þær kröfur sem gerðar eru til nútíma vegaframkvæmda.
Þannig hefst bókun sem samþykkt var samhljóða á fundi bæjarstjórnar Vesturbyggðar í gær. Síðan segir í bókuninni:
Úrskurður Skipulagsstofnunar ber vott um fyrirfram ákveðnar skoðanir á vegagerð á Vestfjörðum og fullkomna vanþekkingu á staðháttum, samfélagi og lífríki á þessu svæði. Reynslan hefur t.d. sýnt fram á að arnarvarp spillist ekki vegna umferðar bíla heldur vegna annarra ástæðna.
Augljóst er á áliti Skipulagsstofnunar að enn á að tefja möguleikana á vegabótum um Vestfjarðaveg nr. 60.
Bæjarstjórn Vesturbyggðar harmar ennfremur að Dýrafjarðargöng séu ekki sett á dagskrá fyrr en árið 2018-20. Það er sorglegt að sjá að samgöngubætur á Vestfjörðum séu svo aftarlega í forgangsröðuninni og raun ber vitni og öðrum verkefnum sem síðar voru áætluð sé skotið fram fyrir án fullnægjandi rökstuðnings og fjármögnunar.
Bæjarstjórn Vesturbyggðar hvetur Vegagerðina til dáða í verkefnum sínum, þau eru mikilvæg fyrir land og þjóð.
Bæjarstjórn fól bæjarstjóra að senda ályktun þessa til innanríkisráðherra, þingmanna kjördæmisins og annarra sem málið við kemur.
Sjá einnig:
Reykhólavefurinn 07.12.2011 Vegagerðin ætlar samt að halda sínu striki
Reykhólavefurinn 07.12.2011 Skipulagsstofnun þversum gegn nýjum vegi