„Umræðan um Vestfjarðaveg 60 í Gufudalssveitinni hefur þegar sannað gildi sitt. Frumvarp okkar Ásbjörns Óttarssonar og Gunnars Braga Sveinssonar, sem mælt hefur verið fyrir á Alþingi, gerir ráð fyrir að lögfest verði svo kölluð B-leið. Það er að vegur verði lagður út með Þorskafirði vestanverðum, þverun Djúpafjarðar og Gufufjarðar, frá Hallsteinsnesi, að Grónesi og yfir á Melanes, innan til við Skálanes á milli Djúpafjarðar og Kollafjarðar. Þessi leið er vel undirbúin og ef Alþingi samþykkir er ljóst að hægt er af tæknilegum ástæðum að hefjast mjög fljótt handa við framkvæmdir. Um eitt þúsund Vestfirðingar hafa nú hvatt okkur þingmenn til þess að styðja við þessa leið. Um hana hefur verið víðtæk samstaða heimamanna, þar með talið sveitarstjórnarmanna.“

 

Þannig hefst grein Einars K. Guðfinnssonar alþingismanns, Krafan er sú sama - höggvum á hnútinn, sem er í heild undir Sjónarmið / Aðsent efni í valmyndinni vinstra megin.

 

Varðandi hugmyndir um uppbyggingu vegar um Ódrjúgsháls segir Einar Kristinn: „Er það fullnægjandi leið að vetri til? Sömuleiðis blasir við að þessi kostur mun fela í sér mjög umtalsverða umhverfisröskun. Skering hlíðarinnar við utanverðan Djúpafjörð, sem verður afleiðing af vegagerð um Ódrjúgsháls, verður lítið augnayndi. En kannski kæra eftirlits- og umhverfisstofnanir sig kollóttar og landeigendur í Þorskafirði láta sér það kannski í léttu rúmi liggja, til þess að losna við vegagerð um eigin landareign?“

 

Hér á vef Reykhólahrepps hafa á liðnum misserum og árum verið birtar fjölmargar fréttir af gangi mála - og gangleysi - varðandi Vestfjarðaveg nr. 60 um Reykhólahrepp. Jafnframt hafa verið birtar greinar sem túlka ólík sjónarmið, nú nýlega eftir Ólínu Þorvarðardóttur, Þórólf Halldórsson, Úlfar Thoroddsen og Kristin Bergsveinsson (Sjónarmið / Aðsent efni).