Ert þú með góða hugmynd og langar að hrinda henni í framkvæmd? er spurt í bæklingi til kynningar á framkvæmd Vaxtarsprota í Reykhólahreppi og Dalabyggð. Á miðvikudag í næstu viku (10. september) verða kynningarfundir á Reykhólum og í Búðardal, þar sem Elín Aradóttir verkefnisstjóri kynnir Vaxtarsprota. Þar munu einnig Vilhjálmur Vernharðsson og Elísabet S. Kristjánsdóttir sauðfjárbændur í Möðrudal á Fjöllum segja frá reynslu sinni, en auk hefðbundins búskapar reka þau kjötvinnslu og ferðaþjónustu, og Kjartan Ragnarsson, leikstjóri og forstöðumaður Landnámsseturs í Borgarnesi, flytur erindi með heitinu Að finna sína fjólubláu kú.

Fundirnir eru opnir öllum áhugasömum um atvinnumál í Reykhólahreppi og Dalabyggð. Fundurinn á Reykhólum verður í Reykhólaskóla og hefst kl. 15. Fundurinn í Búðardal verður í Dalabúð og hefst kl. 20.30.

Verkefnið Vaxtarsprotar er stuðningsverkefni sem ætlað er að hvetja fólk til að skapa sér atvinnu í heimabyggð. Það er opið öllum íbúum í sveit, óháð eðli viðskiptahugmynda, atvinnugreinum eða reynslu þátttakenda á sviði atvinnurekstrar. Íbúar í þéttbýli geta einnig verið með en ábúendur á lögbýlum hafa forgang.

Þátttakendur vinna með eigin viðskiptahugmyndir. Fulltrúum starfandi fyrirtækja er einnig velkomin þátttaka með það að markmiði að vinna að frekari framþróun eða mótun nýjunga í rekstri sínum.

Vaxtarsprotar eru á vegum Impru á Nýsköpunarmiðstöð Íslands og Framleiðnisjóðs landbúnaðarins. Unnið er í samstarfi við Búnaðarsamtök Vesturlands og Atvinnuþróunarfélag Vestfjarða.

Fólk í Reykhólahreppi er eindregið hvatt til að sækja kynningarfundinn ef kostur er. Á viðtökunum þar byggist framhaldið.

Kynningarbæklingurinn (pdf).