Reykhólastúlkan Fanney Sif Torfadóttir sigraði í Stóru upplestrarkeppninni á Hólmavík í gær, en þar kepptu nemendur í skólunum á Hólmavík, Drangsnesi, Borðeyri og Reykhólum. Keppnin er haldin árlega um land allt meðal nemenda í sjöunda bekk grunnskóla. Keppendur á Hólmavík í gær voru sautján talsins. Nemendur í Reykhólaskóla hafa fimm sinnum tekið þátt í keppninni og alltaf lent í verðlaunasætum.

 

Efstu sætin í keppninni á Hólmavík:

          1. Fanney Sif Torfadóttir, Reykhólaskóla

          2. Eyrún Björt Halldórsdóttir, Grunnskólanum á Hólmavík

          3. Helga Dögg Lárusdóttir, Grunnskólanum á Borðeyri

 

Sérstök verðlaun fékk Andri Már Bjarkason, Grunnskólanum á Hólmavík, fyrir frábæran ljóðalestur.

 

Formaður dómnefndar var Baldur Sigurðsson, dósent í íslensku á Menntavísindasviði Háskóla Íslands. Sparisjóður Strandamanna gaf peningaverðlaun fyrir þrjú efstu sætin.

 

Foreldrar Fanneyjar Sifjar eru Júlía Guðjónsdóttir, skólastjóri á Reykhólum, og Torfi Pálsson, starfsmannastjóri hjá Ístaki.